დაუყოვნებელი გავრცელებისთვის
20 ივნისი, 2015

თბილისი ქართველი და ამერიკელი მოზარდების საკალათბურთო ტურნირს მასპინძლობს

22 ივნისს, მთაწმინდის პარკში გაიმართება ქართველი და ამერიკელი სკოლის მოსწავლეების მიერ დაკომპლექტებული საკალათბურთო გუნდების პირველი ტურნირი „ვითამაშოთ კალათბურთი - საქართველო". ამ ტურნირისთვის, სპეციალურად ნიუ ორიკის შტატის ორი ქალაქიდან, ალბანი და ბაფალო ჩამოდის გოგონათა და ვაჟთა სკოლის საკალათბურთო გუნდები.

ტურნირში მონაწილე ქართული საკალათბურთო გუნდები 2015 წელს ჩამოყალიბდა. ისინი დაკომპლექტებულია თბილისის სხვადასხვა სკოლის მოსწავლეებით, რომლებსაც ავარჯიშებენ და მეურვეობენ სკოლის მანდატურები, ხოლო მათთან პერიოდულად სტუმრობს სამართალდამცავი და გუნდის წევრ მოზარდებთან საუბრობს ცხვორების ჯანსაღი წესის, საზოგადოებრივი წესრიგის და სხვა მნიშვნელოვანი საკითხების შესახებ, მათთან ერთად გეგმავს სხვადასხვა კლასგარეშე აქტივობებს.

საკალათბურთო ტურნირი ხორციელდება პროგრამის „ვითამაშოთ კალათბურთი- საქართველო" ფარგლებში, რომელსაც საქართველოში ორგანიზაცია PH International-ი ახორციელებს,ამერიკის სახელმწიფო დეპარტამენტის განათლებისა და კულტურის საქმეთა ბიუროს გაერთიანებული საერთაშორისო სპორტული ინიციატივების განყოფილების ფინანსური მხარდაჭერით. ტურნირის ორგანიზატორია საქართველოს კალათბურთის ფედერაცია, ქალაქ თბილისის მერიისა და საგანმანათლებლო დაწესებულებების მანდატურის სამსახურის მხარდაჭერით. ტურნირს დაესწრებიან ქართული კალათბურთის ცნობილი სახეები და საპატიო სტუმრები.