26 თებერვალს გაიმართა გარემოს დაცვის მინისტრის ბრიფინგი, რომლის ფარგლებში წარმოდგენილი იქნა  ინფორმაცია ხუდონის ჰიდროელექტროსადგურის მშენებლობისა და ექსპლუატაციის გარემოზე ზემოქმედების შეფასების ანგარიშის განხილვაში საერთაშორისო ექსპერტების ჩართვის შესახებ.

ბრიფინგში მონაწილეობდნენ გარემოს დაცვის მინისტრის პირველი მოადგილე ნინო შარაშიძე და ნიდერლანდების სამეფოს გარემოზე ზემოქმედების კომისიის (NCEA - Netherlands Commission on Environmental Assessment) დირექტორი არენდ კოლჰოფი.

ხუდონის ჰიდროელექტროსადგურის მშენებლობის საკითხის აქტუალობიდან გამომდინარე, გარემოს დაცვის სამინისტრომ მიმართა ნიდერლანდების მთავრობას საექსპერტო მომსახურების უზრუნველყოფის თხოვნით.

სამინისტროს მიმართვის საფუძველზე ნიდერლანდების გარემოზე ზემოქმედების კომისია (NCEA - Netherlands Commission on Environmental Assessment) უზრუნველყოფს საერთაშორისო ექსპერტების ჩართვას ხუდონის ჰიდროელექტროსადგურის მშენებლობისა და ექსპლუატაციის გარემოზე ზემოქმედების შეფასების დოკუმენტის განხილვაში.  ექსპერტთა ჯგუფი ჩამოვა საქართველოში, ქართველ ექსპერტებთან ერთად საველე ვითარებაში დეტალურად შეისწავლიან საკითხს და შეიმუშავებენ შესაბამის რეკომენდაციებს.