თბილისი. 27 თებერვალს გაიმართა კონფერენცია, რომელის მიზანი იყო „გენდერული თანასწორობის უზრუნველსაყოფად განსახორციელებელი 2011 - 2013 წლების ეროვნული სამოქმედო გეგმის" შესრულების შეფასება და განხილვა. კონფერენციას ესწრებოდნენ პარლამენტის გენდერული საბჭოს წევრები, სამინისტროების, არასამთავრობო და საერთაშორისო ორგანიზაციების წარმომადგენლები

შეხვედრის ორგანიზატორები იყვნენ პარლამენტის გენდერული საბჭო და გაეროს ერთობლივი პროგრამა „გენდერული თანასწორობის ხელშეწყობისათვის საქართველოში".

შეხვედრა გახსნეს საქართველოს პარლამენტის ვიცე სპიკერმა და გენდერული საბჭოს თავჯდომარემ მანანა კობახიძემ და გაეროს განვითარების პროგრამის მუდმივი წარმომადგენლის მოადგილემ ინიტა პაულოვიჩამ.

„საქართველომ მნიშვნელოვანი ნაბიჯები გადადგა გენდერული თანასწორობის სფეროში. ეს ეხება როგორც ქვეყნის კანონმდებლობას, ისე საერთაშორისო კონვენციების შესრულებას. მიუხედავად ამისა, განვითარების ყველა სფეროში, განსაკუთრებით გადაწყვეტილების მიღების საკითხებში, თანასწორობის მიღწევა ჯერაც დიდ ძალისხმევას მოითხოვს.  პრობლემების გამოვლენა და ამის საფუძველზე ახალი სამოქმედო გეგმის შექმნა ძალზე მნიშვნელოვანია. მოხარულები ვართ, რომ ამ პროცესს ხელს ვუწყობთ", - თქვა ინიტა პაულოვიჩამ.

კონფერენციის მონაწილეებმა განიხილეს 2011-2013 წლების სამოქმედო გეგმის შესრულება, რომელიც  მიზნად ისახავდა გენდერული თანასწორობის სახელმწიფო პოლიტიკის განხორციელებას ისეთ სფეროებში, როგორიცაა განათლება, ჯანდაცვა, სოციალური საკითხები, ეკონომიკა, გარემოს დაცვა და სამშვიდობო პროცესები, და ასევე ითვალისწინებდა ქალთა და მამაკაცთა სრული და თანაბარი მონაწილეობის ხელშეწყობას   გადაწყვეტილების მიღების ყველა დონეზე.

კონფერენციის მონაწილეებმა ასევე ისაუბრეს მომავალი სამოქმედო გეგმის მთავარ ამოცანებსა და მისი შემუშავებისათვის საჭირო პროცედურებზე.

საკონტაქტო ინფორმაცია

მაკა გვრიტიშვილი, UNDP საქართველო: 551 988999(მობილური), maka.gvritishvili@undp.org

სოფო ჭიჭინაძე, UNDP საქართველო: 599 196907 (მობილური), sophie.tchitchinadze@undp.org

დამატებითი ინფორმაცია: გაერო, შვედეთის საერთაშორისო განვითარებისა და თანამშრომლობის სააგენტოს (Sida) დაფინანსებით, ახორციელებს ერთობლივ  პროგრამას გენდერული თანასწორობის ხელშეწყობისათვის საქართველოში. ამ პროგრამაში ჩართულია გაეროს სამი სააგენტო UNDP(გაეროს განვითარების პროგრამა),  UNFPA (გაეროს მოსახლეობის ფონდი) და UN Women (გაეროს ქალთა ორგანიზაცია).