ნინო ჭანიშვილი ოზურგეთის რაიონში მცხოვრები ახალგაზრდა მეწარმეა. უნივერსიტეტის დამთავრების შემდეგ ნინომ საკუთარ რეგიონში სცადა საქმიანობის დაწყება, თუმცა პროფესიით მუშაობა ვერ მოახერხა და ისევ თავისი ძალებით გადაწყვიტა ისეთი საქმე დაეწყო რაც მოსწონდა და სარგებელსაც მოუტანდა.

„მართვის მოწმობა მქონდა ახალ აღებული და ახლობელს ვასწავლე მართვის მოწმობის თეორიული ნაწილი და წარმატებით ჩააბარა გამოცდა. აქედან გაჩნდა იდეა გამეხსნა ავტოსკოლა. სკოლამდე კი კერძოდ ვამზადებდი მოსწავლეებს თეორიაში,“ - იხსენებს ნინო
ნინო ჯერ კერძო გაკვეთილებს უტარებდა მსურველებს. თავიდან არც მანქანა ჰყავდა და მამის მიკროავტობუსით დადიოდა, რომლის მართვის მოწმობაც დამატებით აიღო. რაიონში და გაკვეთილებზე ნინო ყველგან მიკროავტობუსით დადიოდა და მალე იგი ოზურგეთში ყველამ გაიცნო, როგორც გოგონა „მარშუტკით“. საკუთარი საქმიანობის შედეგად, ახალგაზრდა გოგონამ ნელ-ნელა გარკვეულ თანხასაც მოუყარა და პირველი მანქანაც შეიძინა. შემდეგ ადგილობრივებიც დაასაქმა, აიყვანა პედაგოგები და ინსტრუქტორები, იქირავა პრაქტიკის მოედანი და ავტოსკოლაც გახსნა. 10 წელია მისი სკოლა ერთ-ერთი წარმატებულია რეგიონში და ნებისმიერ მსურველს საშუალება აქვს კვალიფიციური თეორიული და პრაქტიკული ცოდნა მიიღოს. მეწარმე გოგო მუდამ იმის მცდელობაშია დახვეწოს და სრულყოფილი გახადოს საკუთარი სერვისი. გასულ წელს ნინომ ახალი გრანტიც მოიპოვა და ავტოსკოლაში ტექნიკა განაახლა. ამ ეტაპზე უკვე სენსორული მონიტორების საშუალებით მოსწავლეებს იმიტირებულ თეორიულ გამოცდას უტარებენ.

ნინო ჭანიშვილმა ეტაპობრივად საკუთარი ბიზნესიც გააფართოვა და 2500 კვ.მ არასასოფლო-სამეურნეო დანიშნულების მიწა შეიძინა, სადაც ამჟამად სარემონტო სამუშაოები მიმდინარეობს. გოგონა „მარშუტკით“ უკვე საკუთარი სივრცე აქვს მეწარმეობისთვის და საქმიანობის გასაფართოებლად. უახლოეს პერიოდში ნინო გეგმავს თანამედროვე სტილის საგამოცდო სივრცის და პრაქტიკული სავარჯიშო ავტოდრომის მოწყობას. წარმატებულ მეწარმეს ასევე დაგეგმილი აქვს, ამავე მიწის ნაკვეთზე ავტოსერვისიც მოაწყოს, რომელიც სრულ ავტომომსახურების შესთავაზებს მომხმარებლებს.
მიმდინარე წელს ნინო პროექტ USAID YES Georgia-ში ჩაერთო და ბაზ ჯორჯიას სასწავლო პროგრამის მონაწილეც გახდა.
„ყველა ახალი პროექტი ჩემთვის ახალი გამოწვევაა წარმოვაჩინო ჩემი თავი, ჩემი საქმიანობა და ჩემი სიტყვა ყველგან ვთქვა, USAID Yes Georgia ჩემთვის არის მეგობრობის, საქმისადმი სიყვარულის, ახალი ცოდნის შეძენის და საინტერესო ადამიანებთან ურთიერთობის გზა, ასეთი პროექტები არის ბიზნესისთვის ძალიან მნიშვნელოვანი, ეს ჩვენი ნაცნობობა აკავშირებს ჩვენს ბიზნესებს და ბევრი პარტნიორებიც კი გახდნენ, ჩვენ ერთმანეთს ვაძლიერებთ და ერთმანეთისგან ძალიან ბევრს ვსწავლობთ რაც ბიზნესის სამომავლო განვითარებისთვის აუცილებელია,“ - ამბობს წარმატებული ქალი მეწარმე.

Buzz Georgia USAID-ის პროგრამის „ახალგაზრდების და ქალთა მეწარმეობის მხარდაჭერა საქართველოში (YES-Georgia)“ კომპონენტია. YES-Georgia ხორციელდება ფონდი კრისტალის მიერ, USAID-ის და ქალთა გლობალური განვითარების და კეთილდღეობის (W-GDP) ინიციატივის ფარგლებში, ამერიკელი ხალხისგან მიღებული ფინანსური დახმარებით. პროექტს დამატებით ფინანსურ მხარდაჭერას უწევს ფინანსური ჩართულობის ორგანიზაცია კრისტალი.