17 ოქტომბერს 15:00 საათზე, სასტუმრო „თბილისი მერიოტში“ (მის: თბილისი, რუსთაველის გამზ. #13) გაიმართება სკოლის მასწავლებელთა ტრენინგების დასკვნითი ცერემონიალი. ღონისძიება, რომელიც ჰიბრიდულ რეჟიმში გაიმართება, ტარდება"დებატები უკეთესი განათლებისთვის" პროექტის მეორე ფაზის ფარგლებში, რომელიც საქართველოს დებატებისა და განათლების ინსტიტუტის ინიციატივით და გუდავაძე- პატარკაციშვილის ფონდის მხარდაჭერით ხორციელდება. პედაგოგებისთვის სერტიფიკატების გადაცემის ღონისძიებას დაესწრებიან და სტუმრებს სიტყვით მიმართავენ:

• ეკატერინე დგებუაძე - საქართველოს განათლების, მეცნიერების, კულტურისა და სპორტის მინისტრის მოადგილე
• თამარ გაგოშიძე - თბილისის სახელმწიფო უნივერსიტეტის ფსიქოლოგიის და განათლების ფაკულტეტის დეკანი
• ალუდა გოგლიჩიძე - კავკასიის განათლების სკოლის დეკანი
• დალი მინდიაშვილი - გურჯაანის მუნიციპალიტეტის საგანმანათლებლო რესურსცენტრის ხელმძღვანელი

პროექტი „დებატები უკეთესი განათლებისთვის“ მიზნად ისახავს მოსწავლეებში თავისუფალი და დამოუკიდებელი მოქალაქის უნარების განვითარებას და ისეთი უნარ-ჩვევების ჩამოყალიბების ხელშეწყობას, როგორიცაა: კონსტრუქციული მსჯელობა, არგუმენტაცია, მასალების მოძიება, ორატორობა, გუნდურობა, დროის მართვა, ოპონენტის პატივისცემა და სხვა.

სწორედ ამისათვის იგეგმება ადგილობრივი პედაგოგების პროფესიული განვითარების ხელშეწყობა და საქართველოს სხვადასხვა რეგიონის სკოლებში დებატკლუბის ქსელის ფორმირება. ამის შედეგად სკოლის მასწავლებლები, ხოლო შემდგომ მოსწავლეები დაეუფლებიან მსოფლიოში პოპულარულ და ეფექტურ საგანმანათლებლო ინსტრუმენტს, ფორმალურ დებატებს. პროექტის მეორე ფაზის სამიზნე რეგიონებია: თბილისი, იმერეთი, კახეთი, აჭარა, შიდა ქართლი, რაჭა.

პროექტი „დებატები უკეთესი განათლებისთვის“ პირველი ფაზა თებერვალში დაიწყო საქართველოს სხვადასხვა სკოლის დებატების კლუბის ხელმძღვანელების გადამზადებით. ახალი კორონავირუსის პანდემიის შედეგად კი მოხდა პროექტის მოდიფიკაცია და აქტივობების დისტანციურ რეჟიმზე გადასვლა.