შეხვედრაზე მეცხოველეობისა და ცხოველთა ჯანმრთელობის გაუმჯობესების მიმართულებით მიმდინარე პროექტები და სამომავლო თანამშრომლობის საკითხები განიხილეს.
გიორგი ხანიშვილმა ხაზგასმით აღნიშნა საერთაშორისო დონორი ორგანიზაციებთან თანამშრომლობის მნიშვნელობა და მათი როლი როგორც მხარდამჭერ პროექტებში, ასევე ამ კუთხით საზოგადოების ცნობიერების ამაღლების საკითხებში.

„ქვეყანაში მეცხოველეობის დარგის განვითარება ცხოველთა ჯანმრთელობის დაცვის უზრუნველყოფის გარეშე შეუძლებელია. შესაბამისად, განსაკუთრებით მნიშვნელოვანია ამ მიმართულებით საერთაშორისო პარტნიორების, დონორი ორგანიზაციების ჩართულობა. მათი მხარდაჭერით, აქტიურად მიმდინარეობს მუშაობა საკანონმდებლო ბაზის სრულყოფის, ცხოველთა ჯანმრთელობის დაცვის მიზნით პროექტების განხორციელების და ცხოველთა იდენტიფიკაცია-რეგისტრაციის მიმართულებით, რაც ხელს უწყობს მიკვლევადობას და საექსპორტო პოტენციალის ზრდას. დარგის განვითარებისა და თანამედროვე სტანდარტების დანერგვას მიზნით, სამინისტრო მომავალშიც აქტიურად გააგრძელებს თანამშრომლობას საერთაშორისო ორგანიზაციებთან და პარტნიორებთან“, - აღნიშნა მინისტრის პირველმა მოადგილემ.

FAO-ს ევროპისა და აზიის ცხოველთა ჯანმრთელობისა და მეცხოველეობის განყოფილების ხელმძღვანელმა, ერან რაისმანმა საქართველოში ცხოველთა ჯანმრთელობის დაცვის და ზოგადად, მეცხოველეობის დარგში მიღწეულ შედეგებზე ისაუბრა და ხაზგასმით აღნიშნა, რომ ამ მიმართულებით არსებული პროგრესი გაეროს სურსათისა და სოფლის მეურნეობის ორგანიზაციისა და სურსათის ეროვნული სააგენტოს ეფექტიანი თანამშრომლობის შედეგია.
სამინისტროში გამართულ შეხვედრას სურსათის ეროვნული სააგენტოს უფროსი, ზურაბ ჩეკურაშვილი, სააგენტოს უფროსის მოადგილე ვასილ ბასილაძე, FAO-ს პროექტების მენეჯერი დრაგან ანგელოვსკი და ცხოველთა იდენტიფიკაცია-რეგისტრაციის ეროვნული სისტემის (NAITS) ხელმძღვანელი მიხეილ სოხაძე ესწრებოდნენ.