პრესრელიზი

21 მარტი,2014
დაუყოვნებელი გავრცელებისათვის

საკონტაქტო ინფორმაცია:
საზოგადოებასთან ურთიერთობის დეპარტამენტი
მარშალ გელოვანის გამზირი #6, თბილისი
nfomoa@moa.gov.ge www.moa.gov.ge
ტელ: 237 80 09
მობ: 599 50 26 19

სასოფლო სამეურნეო კოოპერატივების რეგისტრაციის პროცედურები მარტივდება

სასოფლო-სამეურნეო კოოპერატივების რეგისტრაციასთან დაკავშირებით, საჯარო რეესტრის ეროვნულ სააგენტოში ურთიერთთანამშრომლობის სამმხრივი მემორანდუმი გაფორმდა. მემორანდუმს ხელი მოაწერეს საჯარო რეესტრის ეროვნული სააგენტოს თავმჯდომარემ პაპუნა უგრეხელიძემ, სოფლის მეურნეობის სამინისტროს სასოფლო-სამეურნეო კოოპერატივების განვითარების სააგენტოს თავმჯდომარემ გიორგი მიშელაძემ და ნოტარიუსთა პალატის თავმჯდომარის მოადგილემ ლალი გზირიშვილმა.
მემორანდუმის მიზანია უწყებებს შორის თანამშრომლობის გაღრმავება, რაც სასოფლო-სამეურნეო კოოპერატივების რეგისტრაციის გამარტივებას შეუწყობს ხელს. დაინერგება ერთი ფანჯრის პრინციპი და საჯარო რეესტრის მიერ ავტორიზებულ ნოტარიუსებს ენიჭებათ უფლებამოსილება სასოფლო-სამეურნეო კოოპერატივის რეგისტრაციზე განაცხადი მიიღონ.
„მეწარმეთა შესახებ" და „სასოფლო-სამეურნეო კოოპერატივების შესახებ" კანონის შესაბამისად, სასოფლო-სამეურნეო კოოპერატივები კერძო სამართლის იურიდიულ პირებს წარმოადგენენ. შესაბამისად, მათ რეგისტრაციას იუსტიციის სამინისტროს საჯარო რეესტრის ეროვნული სააგენტო ახორციელებს. სასოფლო-სამეურნეო კოოპერატივის სტატუსს კი, სოფლის მეურნეობის სამინისტროს სასოფლო-სამეურნეო კოოპერატივების განვითარების სააგენტო ანიჭებს. სტატუსისი მინიჭების შემდეგ, მეწარმეებს კანონით განსაზღვრული შეღავათებითა და სახელმწიფო ხელშემწყობი პროგრამებით სარგებლობის შესაძლებლობა ექნებათ.
სასოფლო-სამეურნეო კოოპერატივის რეგისტრაციისთვის, დაინტერესებულმა პირმა საჯარო რეესტრში უნდა წარადგინოს:
• განცხადება/ დამფუძნებელთა შეთანხმება;
• მომსახურების საფასურის გადახდის დამადასტურებელი დოკუმენტი

დარეგისტრირების შემდეგ, სასოფლო-სამეურნეო კოოპერატივების სტატუსის მოსაპოვებლად მეწარმეებმა განცხადებით უნდა მიმართონ სოფლის მეურნეობის სამინისტროს სასოფლო-სამეურნეო კოოპერატივების განვითარების სააგენტოს და წარადგინონ შემდეგი დოკუმენტები:
• უფლებამოსილების დამადასტურებელი დოკუმენტი;
• საკუთრებაში ან/და სარგებლობაში არსებული ქონების დამადასტურებელი დოკუმენტი
• სასოფლო-სამეურნეო კოოპერატივის წესდება